Merimies muistelee.

Kotimaa jääpi

Vaarat vankat vajattethiin
taka aappoin syvviin vessiin
etupuolla tulivaaroin
aukkeet lajet syljeskelthiin
tulta tuhkaa aukisuin

Lintu laski läpi pilviin
saari iti miehen silmhiin
kaunhiimpana kalhiimpana
miehen ennen näkemiitä
kiertelessä maailman maita

Laskiessa jalkans maahan
magmasaaren manterheelle
laavamaaston tanterheelle
luonto ryhtyi lukemhaan
miehen mielheen historiaa

Saaren suurta saaga-aikkaa
kirjoituksii kertomiita
miehisistä miehistä
joitten veri vuoti maahan
henki heiđän jäi elähän

Sointi äänen Ingolfurin
Arnardinpojan ilohuuto
toolitolppin löyttäissä
tarttui korvhiin reisumiehen
Löylylahđen rannoila

Ingolfurin mieli putois
havaitessaan tulipalloi
höyryilevän rannala
kuka tänne ennen meitä
mistä tullu miitä teitä

Käykkää pojat kattomassa
silmäilemässä vierahaita
maastoo uutta tutkimassa
luonttoo tarkastelemassa
mitä tarjona lie sillä

Pojat tulthiin puhtahina
haisuheinältä tuoksuvina
tiettoin kansa johtajalle
sielä on vettä lämpimää
mutta ei kethään ihmistä