Ruijan Kaiku kävi kattomassa usseita Paaskiviikon tapattummii. Jokkun näistä tapattumista oli laitettu Paaskiviikon programhiin vaikka net ei olheet mithään varsinaissii festivaaliviikon tapattummii. Sen olis tietenki saattanu sjekata jo ennen. Mutta programmii oon seittemässä komuunissa (tänä vuona Tromssaki oli mukana) ja se näyttää ette programmin tekeminen ei onnistu samassa.

Paaskiviikon programmin tekeminen oon Haltin kväänisentterin johtaajan tehtäävä. Hän tekkee programmin yhđessä toisten aktööriitten, vappaaehthoisten organisasuuniitten ja paikalisten tulisieluitten kans. Se vaattii paljon koordineeraamista ja hallinttoo – ja kaikki tämä työ tullee sentterin johtaajan muitten tehtääviitten pääle.
Se oon aivan selvä ette tähään työhöön tarvittais aivan oma virka.

Festivaalin oon kasunnu 10 vuođessa. Täna vuona publikummii oli 1400 – se oon paljon vähemän ko viimi vuona. Met meinaama ette festivaali saattais olla paljon suurempiki. Likialala oon muita suurii festivaalii millä oon omat työntekkiijät. Esimerkiksi Riddu Riđđussa käy viis-kuus tuhatta vierasta neljen päivän aikana.

Riddu Riđđula oon nelje täysipäiväistä työntekkiijää ja 120 hengen muu joukko joka oon mukana koko vuođen. Het autethaan tekemhään plaanoi ja viemhään net läpi. Lisäksi 200 vapaaehthoista auttaa festivaalin aikana. Mutta niinko festivaali kirjoittaa nettisivula: kaikkiin tärkkeintä oon ette usseemat ja usseemat nuoret ylppeinä saatethaan ylppeinä muistela omasta saamelaista alkupörästä.

Met emme kohđatelheet kovinkhaan monta lasta Paaskiviikola. Ei kethään joka olis muistelu kainulaisesta alkupörästä. Tässä oon festivaalin johđola iso työsarka. Samala ymmärrämä ette se ei ole mahđolista niilä ressursiila mitä festivaalila oon nyt. Se tarvittee isoman organisasuunin ja aktiivisen markkinoimisen ja kaikkiin eniten lissää rahhaa päättääviltä viranomaisilta. Met toivoma ette kainulaisten histooria, kieli ja kulttuuri tulis paremin näkkyyville ja siitä tulis osa muuta yhtheiskuntaa. Paaskiviikon nostaaminen auttais tähään. Tapattumat ei ole tyhä kainulaissii varten vaan festivaali koskettaa koko tämä alan yhtheiskuntaa. Politikkarit häyđythään tulla esile. Raamit tämmöisheen tapattumhaan tullee siitä minkälaiset resurssit sillä oon.

Toivoma kans usseempii tapattummii lapsile ja nuorile.

Kväänin kieli ja kulttuuri ei säily tulevaisuuđessa ilman tääpäivän nuorten inttoo ja ylppeyttä.

Festivalen har vokst på de 10 årene den har blitt arrangert. I overkant av 1400 var innom årets kulturdager – og dette er klart mindre en foregående år.