Olmavankkalaiset kainun kielen oppilhaat Adam (12), Kaisa (12), Levi (11) ja Kristoffer (12) oon perustanheet bändin KvääniRock.

Heidi Nilima Monsen
heidi@ruijan-kaiku.no

Het kaikki laulethaan KvääniÄäni-kuorossa mutta het haluthiin jotaki muutaki.
Ennen joului nuoret pelathiin heän itte tekemän rokkibiisin «Megavoima» stuudiossa Alattiossa. Musikkiprodusenttina oli Eirik Aune.
Ruijan Kaiku oon tehny dokumentin koko prosessista sekä musikkiviideon. Sen oon filmanheet Even Martinsen ja Mika Hætta. Dokumentin ja musikkiviideon näytethään neljenä episoodina Ruijan Kaijun nettisivula talvela.

Harvinainen kieli
Dokumentissa nuoret puhuthaan kans siitä minkälaista oon olla kainulainen nuori tääpänä, ja oppiit kieltä jota melkkein kekkhään muut nuoret ei saata.

– Se oon kummalista ja tyhmää ette met nelje olema melkkein ainuat kvääänioppilhaat mailmassa. Ainaki Tromssassa, Levi sannoo.

Hän tiettää ette monet heän koulun oppilhaat halluis oppiit kainun kieltä mutta näitten vanhiimet meinathaan ette se tullee tyhä turhaa työtä.

Heilä ei  myöskhään ole ollu kväänin kielen opettaajaa tänä vuona. Siksi kuoro oon tärkkee.

Lapsila oon huoli kainun kielen säilymisestä.
– Se olis surulinen jos kukhaan ei ennää puhuis kväänii, Kristoffer meinaa.
– Jos mie joskus saan lapsii, mie ainaki halluun opettaat heile kväänii, Levi sannoo.

Hullutelhaan kielelä
Kaisa oon huomanu ette toiset oppilhaat oon alkanheet intresseeraamhaan ja ymmärtämhään jotaki ko het oon kuunnelheet heitä. Het kans ilvetithään ja leikithään kielelä.
– Jokku luulhaan ette sattaavettä oon kiroussana! Levi naureskellee.
Heilä oon kans oma loru millä het hullutelhaan ko toiset ei ymmärrä.

– Mie, sie, lamphaanpää! Adam ja Kaisa osoitethaan sormela ja naurethaan pääle.
– Jokku luulhaan kans ette met tyhä laitama pukstaavin “i” ruijalaisen sanan lopphuun niin sitte se oon kväänii,  niinko vaikka  «grööni lastebiili». Mutta ei se ole niin helppo. Se toimii tyhä joissaki sanoissa, Kristoffer tiettää.

Laulu luvattomasta skuutteriajosta
Het oon kuunelheet kväänin musikkii esimerkiksi Spotifyssä mutta kväänin musikkii oon hyvin vähän. Se oon olluki yksi heän motivasuuni oman musikin tekemisheen.
– Met halusimma tehhä rokkibiisin missä oon viekhaat sanat. Sitte se oon hauska! Kristoffer sannoo.
Laulussa muistelhaan luvattomasta skuutteriajamisesta Kilpisjärveltä Karesuvanthoon. Vauhti oon hirmuinen ja skuutteri ossuu porotokkhaan. Puoli tokkaa jää skuutterin alle.
– Ja ajajan kaikki luut katkethaan ja hänen pää lähtee irti mutta hän jatkaa tyhä sisula etheenpäin, Kaisa selittää.

Produsentti praamaa
Nuoret oon itte kirjoittanheet tekstin ja musikin ja het pelathaan  itte trommii, bassoo ja keyboardii.

Musikkiprodusentti Eirik Aune praamaa nuorii.
– Teilä oon hirmuisen hyvä rytmin ymmärys. Monet lapset saatethaan laulaat ja pelata mutta kaikila ei ole yhtä hyvä rytmi ko teilä. Tosi hyvä! Tämän pääle oon hyvä rakenttaat! Aune sanoi nuorile lopuksi. (Käänös: LK)