Työkirjan kannessa olevasta kuvasta. (Kuva: Riinakaisa Laitila/Kainun institutti)

 

Samala het opithiin enämen kväänin kieltä.

 

Pressemellinki Kainun instituttu:

Puteetti ja sen viljely oon ollu tärkkee osa kvääniin ruokakulttuurii monnii sattoi vuossii. Kväänit olthiin ensimäiset puteetin viljelijät monissa paikoissa Pohjais-Norjassa. Kvääniksi puteetin saatethaan käskeet kans putaatiksi ja potuksi. Kainun institutti oon kehittänny tämän työkirjan. Kirja oon puteetin kylvämisestä kvääniksi.

Se opastaa, ohjaa ja anttaa ideet ja sanavarat siihen kuinka perintheistä ruokkaa saattaa kylväät kantamavoimaisesti. Puteettiprosektin mooli oon se ette oppilhaat oppiivat puteetin histooriasta Pohjais-Norjassa, missä kväänit, saamelaiset ja norjalaiset oon asunheet samoila aloila.

Lue lisää: Gir ut tospråklig læremateriell om potetdyrking

Prosekti anttaa tiettoo puteetin kylvämisestä, viljelemisestä ja nostamisesta. Ko oppilhaat työteleevät, het oppiivat samala kvääninkielissii sannoi ja termii puteetin viljelemisestä. Prosektin pohjana oon learning by doing-metuudi.

Kainun institutti toivoo ette työkirja saattaa anttaat illoo ja hyöttyy oppilhaile ja opettaajile jokka halluuvat oppiit kväänii samala ko het viljeleevät puteettii ja muita syötävii kasvui. Materiaalin saattaa pittäät kväänin kielen opettamisessa kaikila tasoila, mutta se passaa parhaimitten nuortenkoulhuun.

Kirjan oon luotu, pietty ja testattu yhessä Pyssyjoven kasutussentterin kans piluttiprosektissa vuona 2022. Puteettiprosekti oon poikkifaakilinen prosekti jossa oon kaheksen eri jaksoo. Pyssyjoven kasutussentterin oppilhaat oon vienheet läpi kaikki jaksot Pyssyjoven koulussa ja Kainun institutissa. Se antoi hyvät resultaatit, ja prosektin jatkethiin etheenkäsin vuosina 2023 ja 2024.

Oppilhaat nostethiin suuret saot puteettii vuosina 2022-2024. Samala het opithiin enämen kväänin kieltä. Rektori Kirstin Eliassen ja koulun opettaajat oon olheet myötä evalueeraamassa sitä kuinka prosektin ja sen materiaalin saattaa sovittaat oppiplaanan faakimooliin jälkhiin.

Kainun institutti oon kehittänny materiaalin etheenkäsin ja laittanu tämän kirjan. Institutti oon saanu rahoitusta UDIR:in rahoitusoorningista oppimateriaalille jonka oon meinattu pienile faakialoile. Tämä kaksikielinen työkirja «Puteettimaa – potetland» oon tehty näilä rahoila, ja se oon saantheila kaikile.