Seminaari oon 13.-14. novemperikuuta. (Kuva: kieliarena.com)
Meänkielen seminaarin 2020 piethään koronan takia digitaalisesti.
Liisa Koivulehto
liisa@ruijan-kaiku.no
Isof ja Språkrådet/Kieliraati järjestävä joka vuosi meänkieliseminaarin. Meininki oli ette tänä vuona seminaarin piettäis Matarengissä, mutta eihän se menesty tehhä sillä laila nyt.
Sen sijhaan jokhainen saa osalistuut seminaarhiin ilman reissaamatta: kotona eli omala työpaikala, netin kautta. Päivämäärä oon sama ko mikä oli plaana: 13.-14. novemperikuuta.
Seminaarin järjestääjä oon Samverkansplattform-prosjekti missä oon Övertorneån kunta, Oulun universiteetti ja Kainun institutti.
Seminaaripäivilä oon kaks teemaa: kirjakielen standardiseeraaminen ja kielelä rikastettu opetus.
– Olethan sieki myötä! Met tulema käsittelehmään kysymyksiä siittä kunka kirjakieli minuriteettikielissä ylipäätänsä muotostuu; missä kysymyksissä meilä jo oon vastaukset, mitä oon vielä jäljelä? Kuka päättää kunka sitä kirjotethaan? Millä mallila opetuksessa otethaan huomihoon eri varieteetit ja paikaliset murtheet? Paikannimet ja kyltit – kunka häätyy tavata? järjestääjät motiveeraava omala nettisivula kieliarena.com.
– Met tulema kans saahmaan inspirasuunia kielenelvytyksheen ja siihen kunka pikkuset kielet saattava saaha lissää puhujia. Mitä kielelä rikastettu opetus ja kielipaatimetutiikka oikhein oon? Kunkas toiset kielet Pohjoiskalotilla ja koko mailmassa pärjäävä?
Ensimäisen meänkielen seminaarin piethiin viimi vuona 2019 Uppsalassa. Esitykset jokka sielä näytethiin näkyvä vieläki wepilä UR Play tässä.
– Prukrammi tullee heti! Roiku myötä ja följaa Kieliraatin weppisivua isof.se/meankieli ja Instagram (”kieliraati”). Jos sulla oon kysymyksiä eli iteoita meilaa: meankieli@isof.se
Seminaarin piethään netissä. (Kuva nettisivulta: kieliarena.com)
