Flytende badstu er blitt åpnet i indre havn i Tromsø. (Kuva: Liisa Koivulehto)
Sauna oon flootan päälä kaupungin sentrumin sisäsatamassa. Se oon kaikile.
Liisa Koivulehto
liisa@ruijan-kaiku.no
Saunan aukaisthiin viimi viikola. iTromsø-aviisi oon muistelu tästä ja saunaplaaniista monta kerttaa, viimeksi tässä:
Saunan omistaaja oon Pust Tromsø AS minkä takana oon kolme tromssalaista: Leif Tinus Smith Næss, Andreas Joki Arild ja Erik Stange Ankre. Het oli ajatelheet jo kauvoin ette tämmöinen sauna vailuu Tromssassa.
Het alethiin työhöön viimi desemperikuussa. Korona kiusas alkuvuona ja meinas topata heän plaanan, mutta aprilikuusta asti het oon työtelheet täysilä prosjektin kans.
Arkkitehti oon Uslusta. Saunan oon rakenettu Tromssassa målselviläisestä puutavarasta. Flootan oon tehty Kvaløyala. Rakentaminen kesti alle vuuen ja se maksoi liki kaksi miljoonaa kruunuu. Saunassa oon sähkökiuvas.
Tarjous kaikile
Het muistelhaan ette sauna oon kaikile, sekä lukaaliile ihmisille ette turistiile.
– Meän ideea oon ette tämä ei ole mikhään tyyris turistiprodukti vaan tarjous kaikile, eriliikaisesti lukaaliile ihmisille, Erik Stange Ankre sannoo iTromsø-aviisile.
Saunassa oon vaimoitten ja miesten garderoobit ja dyssit. Sisälä oon sijjaa 25 kylppiijälle ja ikkunasta oon näkymä öysthään eli salmele ja Tromsdalenhiin päin.
Satamassa oon kans laiva minkä peräkannela oon tynnörisauna mutta siitä oon vaikkeempi päästä uimhaan. Kuva: Liisa Koivulehto
