– Nyt oon hämähäkkiaika Tromssan museossa

Elukoitten hoittaaja Remi Andersen piättellee Hercules-kuorieläintä. Koirhaala oon pitkä sarvi mitä se käyttää ko se tappelee toisten koirhaitten kans. (Kuvat: Liisa Koivulehto)

Tromssan museuumin informasuunityöntekkijä Per Helge Nylund tervettellee selkkeelä kvääninkielelä.

Liisa Koivulehto
liisa@ruijan-kaiku.no

Museuumin toisessa kerroksessa oon eksoottissii vierhaita: Karvaissii hämhäkkii, skorpioonii, tuhatjalkaissii, torakoita, kuorielukoita, tikkuelukoita ja niin poispäin. Usseimat niistä assuuvat lämpimissä maissa.
Nämät elukat oon kuitenki kasunheet Perunan Akvaariossa. Perunan Akvaario oon kovonu näyttelyn mikä kulkee 9 kuukautta Pohjais-Norjassa. Tromssan jälkhiin näyttely tullee Alattiohoon.

– Miksi meän pohjaisen ihmisten tarvittee tiettäät etelän elukoista?

Perunan Akvaarion elukoitten hoittaaja Remi Andersen esittellee tarantellaa. – Tarantella oon hyvin ylheinen hobbyelukka, hän sannoo. Per Helge Nylund vasemalla.

– Met reissama paljon ja meile tullee paljon tavaraa ympäri mailmaa. Laivoissa ja kontiissa tullee monenlaissii hyöniäissii ja esimerkiksi myrkylissii hämhäkkii Ruijhaanki. Näyttelyn avula halluuma anttaa tiettoo näistä elukoista. Hyöniäiset oon kans tulleevaisuuen ruokkaa, elukoitten hoittaaja Remi Andersen muistelee.

Tuhat elukkaa

Näyttelyssä oon 40 klasiloovaa, terraarioota. Johkaisessa oon yksi laji. Erilaissii tarantellahämhäkkii oon yksitoista.

– Kunka monta elukkaa täälä oon?

Skolopenderi eli juoksujalkainen oon peto.

– Sikkaristi tuhat! Eninosa oon torakoita.
Yhđessä loovassa oon puupala minkä alla vilisee monta pientä vaaleeta skorppioonii. Andersen aukaisee terraarion oven.

– Hui! Eikö nämät ole myrkylissii?

Torakka (kakkerlakki) pystyy liikkumhaan pystyssä klasiseinässä kiini.

– Oon. Sanoma ette niitten pistos oon sata kerttaa vahvempi ko honninkimettiisen pistos! Andersen vastaa.
Hän oon työtely näitten kans Perunan Akvaariossa 16 vuotta. Hän oli kiinostunnu reptiiliistä ja hyöniäisistä jo pienenä.

– Tämä kiinostavat sekä lapsii ette ikäihmissii. Monet raavhaat sannoovat ette het pöläthään hämhäkkii mutta ko het tulhaan tänne, het saattaavat kattoot niitä klasin läpi vaikka kunka pitkän aikkaa, hän muistelee.