Kuva: Christina Gjertsen
«Sie olet pilanu koko salaatin.»
Teksti: Anna-Kaisa Räisänen
Kuvat: Christina Gjertsen
Oon perjantai. Pappa nouttaa Linuksen lastentarhaasta. Mammala oon ollu hirmuinen hoppu koko viikon, eikä pappa, Linus ja Karhu Riepu ole nähnheet mammaa ko hiljain illala ennen ko het oon menheet nukkumhaan.
Pappa, Linus ja Karhu Riepu istuvat biilhiin ja starttaavat lastentarhaasta kothiin. Het meinaavat laittaat tääpänä keskipäiväksi salaattii ja lohta ennen ko mamma tullee työstä. Matkala kothiin het hakkeevat kaupasta puteettii, salaattii, agurkkii, löökii, leippää, voita, juustoo, maittoo ja jääkreemii.
Ko het kolme tullevat kothiin, het menneevät suorhaan köökhiin ja ottaavat kaikki ruvat kauppaväskystä. Pappa pyyttää Linusta ottamhaan salaatti ainheet pöyäle ja sannoo, “sie Linus saat tehä salaatin, niin mie keitän puteetit ja lohen.”
Linus ottaa 4 tomaattii, puoli agurkkii, palaisen punaista löökkii, paprikan ja salaatin framile pöyäle oottamhaan. Pappa pyyttää Linusta vielä noutamhaan prätän ja veitten, ja Linus tekkee niin ko pappa sannoo.
Les teksten på norsk: Linus lager tomatsuppe
Pappa tullee Linuksen tykö ja näyttää kunka tomaatit leikathaan ensisti puoliksi, sitten vielä puolikhaat puoliksi ja vielä kerran puolikhaan puolikhaat puoliksi. Karhu Riepu kattoo vieressä nöijisti. Ko Linus nyt alkkaa leikkaamhaan tomaattii, papan mobiili ringaa ja pappaa mennee tuphaan praataamhaan.
Linus oon nyt köökissä Karhu Rievun kans, ja het leikkaavat ensimäisen, toisen, kolmanen ja vielä neljänenki tomaatin. Het leikkaavat net kahekshaan oshaan, juuri niin ko pappa opasti.
Ko Linus ja Karhu Riepu oon valmhiit, het menevät tuphaan ja freistaavat kyssyyt appuu papalta. Pappa tyhä praataa mobiilhiin jolleki ja kattoo klasista ulos. Hänelä ei ole tila auttaat Linusta ja Karhu Rieppuu nyt.
Niin Linus ja Karhu Riepu menneevät sitte takaisin köökhiin. Het ei viitti oottaat pappaa. Het päättäävät leikata tomaatit vielä kerran. Ko het oon taas valmhiit, het kuuleevat kunka pappa vieläki praataa mobiilhiin, ja niin het sitte leikkaavat tomaatit vielä uuesti pikkupikku palaisiksi. Linus ja Karhu hunteeraavat, “piian se tuli liika pikkupikku tomaattii nyt,” ko het kattovat punaista tomaattimuusii joka oon prätän päälä.
Pappa oon valmis nyt praataamasta ja tullee takaisin köökhiin. “Katto, tässä oon nyt tomaatin palat,” näyttää Linus papale. Linus näkkee tasan papan naamasta ette pappa ei ole niin tytyväinen ja Linus tullee pikkuisen epäsikkariksi.
Linus näkkee kunka pappa suuttuu. Ensisti papan kaula tullee punaiseksi ja sitte levvii punainen färi naamale ja ylös kalhoon. “Mie käskin leikata tomaatit kahekshaan oshaan. Mie en pyytäny laittamhaan tomaattimuusii” pappa sannoo vihaisella lujala äänelä.
Pappa oon nyt niin vihassa ette huuttaa, “sie olet pilanu koko salaatin!” Linus pölkkää pappaa ko pappa oon vihainen, hän tullee alas toolilta jolla hän oon seisonu ja kävelee takapäin köökin loukkhoon. Hänelä oon nyt tyhä halu hävitä kokonhansa.
Karhu Riepu näkkee kunka pappa oon vihainen ja kunka Linus pölkkää. Hän hoksaa paikala kylmäkaapin ovessa jotaki yhen mangneetin alla – sielä oon kortti, jonka het oon saanheet lastentarhaasta ja siinä muistelhaan kunka hantteeranthaan ärrytystä. Karhu Riepu laukkoo laattiin poikki ja nouttaa kortin. Sitte hän laukkoo papan tykö, kiikkuu papan olale ja anttaa kortin papale.
Pappaa ottaa kortin ja alkkaa tavvaamhaan:
Ko sie tulet vihaiseksi:
Toppaa vähän!
Mitä tunnet?
Hengitä syväle,
luje kolmheenja
sano itteles: o-ta rau-has-sa!
Puhu raavhaan kans siitä mitä tunnet.
Nyt Karhu Riepu juoksee Linuksen tykö. Karhu oon hoksanu jotaki, ja sen hän viskuttellee Linuksele, “mutta tomaattimuusista saatama vielä laittaa tomaattivellin.” Linus meinaa ette se oli hyvin hoksattu, ja hän jo melkhein maistaa ja haistaa samala suolaisen ja makkeen punaisen kuuman vellin kielen päälä.
Linus tunttee kunka pappa oon pikkuisen rauhoittunnu eikä hän ittekkää ole ennää niin pölössä. Hän tohtii nyt sannoot, “entä jos tehemä tomaattivellin? Sen saatama vielä laittaat tomaattimuusista.”
“Jo vain! Napa, sen kyllä saatama tehä,” meinaa pappa kans ja hengittää vielä kerran sisäle. Pappa sannoo vielä, “antheeksi ko niin suutuin sinule” ja nostaa Linuksen helmhaan. Linus sannoo papale “saat antheeksi. No, mie olisin saattanu oottaat ette sie tulet”. Karhu Riepu räpyttää silmää Linuksele ja nauraa. Het nouttaavat mamman kokkikirjan ja hakkeevat sieltä reseptin “Mamman paras tomaattivelli”.
Heti oon Linus, Karhu Riepu ja pappa yhessä leikanheet kaikki mitä het tarvitteevat vellhiin. Keitto kiehuu kasserollissa ja sen hyvä haijju kulkkee köökistä koko huonheesseen. Mamma tullee viimen kothiin ja sisäle tuvale. Linus kuulee, kunka mamma huuttaa iloisenna “oi, mikä ihana tomaattivellin haijju täälä oon.”
