Kirjailija Bengt Pohjanen meinaa ette meänkielele ja kväänile kuuluu sama arvo ko valtionkielile. (Kuva: Enikő Molnár Bodrogi)

 

Ruijan kveeniliitto pyyttää ette Pohjaismaitten raati perustais litteratuuripalkinon jonka annettais kväänin- tahi meänkieliselle litteratuurile. 

 

Liisa Koivulehto
liisa@ruijan-kaiku.no

 

Kveeniliitto meinaa ette yhtheinen kielipalkinto olis näkkyyvä merkki pohjaismaisesta yhtheistyöstä. Palkinto lissäis intressii ja nostais kieliin staattusta. Tunnustaminen lissäis inttoo kirjoittaat kväänin ja meänkielelä.

Kveeniliitto lähätti preivin, missä se perhäänkuuluttaa ommaa palkintoo, Pohjaismaitten raatile 15. januaarikuuta tänä vuona.

Siinä se muistelee  ette Ruottin meänkieliset oon kans assiin takana.

Meänkielinen initiaviivi

Kveeniliitto peessaa meänkielissii, mutta kveeniliiton ehđotus oon vähän erilainen.

Meänkielelä kirjoittaaviin kirjailijoitten yhistys Kexi ehđotti näjet jo viimi vuona ette meänkielelä kirjoitetun kirjan sais nomineerata Pohjaismaisen litteratuuripalkinon saajaksi.

– Eikös meänkielelä ole sama arvo ko muilaki kielilä Pohjaismaissa? Kexi-yhistyksen puhheenjohtaaja, kirjailja Bengt Pohjanen kysyi silloin.

SR:n P4 Norrbotten muisteli assiista novemperikuussa 2019. Kuuntele tästä.

Pohjaismaitten raatin kansliista sanothiin silloin ette het saatethaan diskuteerata assiista yhistyksen kans.

Ei saa nomineerata

Kveeniliitto sai vastauksen 20. januaarikuuta: Raatin polittinen johto (presidiuumi) oon päättäny ette meänkielissii kirjoi ei saa nomineerata, ei raavhaitten eikä lasten litteratuuripalkinon saajiksi.

Mutta raati ei vastannu siihen mitä Ruijan kveeniliitto oikkeesti kysyi eli kysymyksheen omasta palkinosta kväänin ja meänkieliselle litteratuurille.

«Nordiska rådets presidium behandlade ärendet på deras möte i januari 2019 och beslutade att inte ställa sig bakom önskan om nomineringar på meänkieli till Nordiska rådets litteraturpris samt Nordiska rådets barn- och ungdomslitteraturpris,» kirjoitti raatin direktööri Britt Bohlin Ruijan kveeniliitole 20. januaarikuuta 2020.

Pohjanen kohđattellee raatin marsikuussa

Kexin johtaaja Bengt Pohjanen ei anna ylön. Hän oon vaatinu ja saanu oikkeuen esittäät oman meiningin ja mielipitheen raatin tieto- ja kulttuurikomiteeale Helsingissä 30. marsikuuta.

–  Komiteea saa samala kuula teän preivistä, raatindirektööri Britt Bohlin kirjoittaa Ruijan kveeniliitole.

Kielioikkeus

Pohjaismaitten litteratuuripalkinon kielet oon valtioitten kielet sekä saame, fääri ja grönlanti. Nils-Aslak Valkeapään Beaivi, áhcázan oon ainua minoriteettikielinen kirja joka oon saanu tämän palkinon, vuona 1991.

– Met vaađima saađa nomineerata meänkielistä litteratuurii, Bengt Pohjanen muistelee Ruijan Kaijule.

– Saamenkielelä oon jo tähän oikkeus. Nyt oon meänkielen ja kväänin kielen aika. Näilä kielilä kirjoitethaan sekä Ruottissa, Suomessa ja Norjassa ja muuvalaki mailmassa, Pohjanen muistuttaa.