Olga Gokkoeva. (Kuva: Liisa Koivulehto)
Nuoret, kouluja käyheet ihmiset oon alkanheet puhumhaan karjalaa.
Liisa Koivulehto
liisa@ruijan-kaiku.no
Ryssän Karjalassa oon Vieljärven komuuni. Komuunissa asuu nuoin tuhat henkkee joista nuoin 70 prosenttii oon karjalaissii. Nuoin 500 henkkee puhhuu karjalaa. Viimi vuoshiin saakka ihmiset oon puhunheet karjalaa tyhä privaatisti. Het ei ole tohtinheet puhhuut ommaa kieltä jos paikala oon ollu ryssänkielissii: Kielen oon vaihettu heti.
Nuoret opetelhaan kielen
Karjalaa oon puhuttu tyhä kylissä. Ko nuoret oon muuttanheet kaupunkhiin, karjalan kieli oon jääny.
Nyt assii oon muuttumassa: Nuoret, kouluja käyheet ihmiset oon alkanheet opettelemhaan karjalaa – ja heilä oon luja ääni.
– Viimi vuona mie päätin ette mie puhun karjalaisten kans aina karjalaa, Olga Gokkoeva muistelee.
Hänen suku on Vieljärvestä. Peret asui kuitenki Petroskoissa ja hän kuuli karjalaa tyhä vanhoilta sukulaisilta kesälä. Gokkoeva päätti opetella kielen.
– Kerran ko mie puhuin karjalaa julkisella paikala, siihen tuli yksi ryssä ja kysyi ette mitä kieltä tuo oon. Ryssä ei ollu koskhaan kuulu ko joku puhhuu karjalaa – vaikka koko kaupunki oon täynä karjalankielissii, Gokkoeva muisteli eilen Tromssassa.
Kulttuuritalossa puhuthaan tyhä karjalaa
Nyt Vieljärvessä oon kulttuuritalo ”Karjalan kielen kodi”.
– Met päätimä ette sielä emme valita venäläistämispolitikista vaan tehemä työtä karjalan kielen etheen. Päätimmä ette se joka valittaa, häyttyy anttaat 1000 ruplaa kielen kehittämiskasshaan. Gokkoeva muisteli.
Lissää Gokkoevan muisteluksii tullee hiljemin Ruijan Kaijussa.
Korjaus 11.04. : Oikkee rahasumma valittamisesta oon 1000 ruplaa.
Korjaus 11.04. : Poistettu tieto ette muitten kielten puhuminen olisi kieletty: Karjalan kielen kodissa saa puhhuut muitaki kielii.
Opettaja, tulkki ja kääntäjä Olga Gokkoeva muisteli karjalan kielen elästyttämisestä Vieljärvessä. Hänelä oon neuvo vanhoile: – Älä paru vaan puhu karjalaa lapsile, hän sanoi. Kuva: Liisa Koivulehto
