Kielen näkyvyys samfunissä – plakkarisanalistasta reflekshiin

Kuva: Naavuonon kielikeskus

 

Lærerik helgelesning om mer kvensk bling, altså nye flotte identitetsmarkører.

Få med deg denne helkvenske teksten fra Kvænangen språksenter.

 

Kväänikansan päivä ja Kväänin kielipäivä lähestyy. Naavuonon kielikeskus lanseeraa sen vuoksi plakkarisanalistan ja kaksi refleksiä. Takana seissoo 17-vuotias Lennart Jenssen ja prosektityöttelijä Eirin Berge Samuelsen.

Kväänin sanoia nuorile

Naavuonon kielikeskuksen johtaja, Katriina Pedersen, ylistää nuori Lennart Jenssenin työtä.

Lennart oon tehny fantastisen työn! Hän oon itte tehny koko sanalistan, kaiken hän oon tehny itte. Oikoluku oon ollu minun tehtävä ja se oli helppo homma ko feiliä oli tuskin lainkhaan, kerttoo Pedersen.

En sak om saken på norsk: Kvensk synlighet – fra lommeordliste til refleks

Tänä vuona kväänin kieli juhlii 20 vuotta. Lennart Jenssen oon itte nuorempi ko kväänin kielen viralinen status, mutta se ei toppaa hänen engasementtia. Hänele oon tähelistä lujittaat kväänin kielen käyttöä nuorten keskuuessa ja lisätä nuorten sukupolven intressi kielheen.

– Tämä prosekti oon ollu jännittävä, ja toivon, ette sanalista auttaa useampia käyttämhään kvääniä arkipäivässä, sannoo Lennart.

Kväänin näkyvyys pimeässä

Ei se ole tyhä Lennart Jenssen, joka oon työnankara Naavuonon kielikeskuksessa. Prosektityötteliä Eirin Berge Samuelsen oon kans löytänyt tavan nostaat kväänin kieltä ja kulttuuria framile: refleksit. Moolina oon levittää tietoa kväänistä samala ko lisäthään turvalista trafikkia pimeässä.

Kielikeskus oon tehny kaks refleksimallia. Toinen oon pyöreä refleksi kvääniruususta – tuttu merkki kväänin identiteetille. Toinen refleksi oon Naavuonon komuunin vaakuna ja vuonon nimi kolmela kielelä – kvääniksi, norjaksi ja saameksi: Naavuono, Kvænangen ja Návuonna.

Refeksien seurassa saapi kans tietokortin. Net kertovat kväänin kulttuurista ja historiasta. Kvääniruusu-refleksin myötä saapi tietoa kväänin flakusta ja muutamia kväänin fraaseja. Komuunikortti selvittellee mitä Naavuonon komuunin vaakuna merkittee.

Pärjäämistä ja yhtheenkuulumista

Naavuonon komuunin vaakunassa oon sinikello, missä oon kolme kukkaa hopeanfärisellä pohjala. Sinikello kassuu ja kukkii vaikka missä ja sen tähen se symboliseeraa kunka Naavuonon ihmiset aina pärjäävät.

Kukan kolme kelloa kuvvaavat Naavuonon perintheiset elämänkeinot: maanpruuki, metänpruuki ja kalastus. Samala net kuvvaavat kunka norjalaiset, saamelaiset ja kväänit elläävät yhessä komuunissa.

Enempää näkyvyyttä

Refleksit ja tietokortit oon osa Naavuonon kielikeskuksen työtä kväänin kielen etheen.

– Refleksit tekkee kielen enämen näkyväksi arkipäivässa, samala net pittää meistä huolen pimeässä, muistelee Eirin Berge Samuelsen.

Kielikeskus toivoo, ette refleksit ja plakkarisanalista otethaan hyvin vasthaan. Refleksit ja plakkarilista jaethaan ulos kansan- ja kielen juhlapäivinä nyt kevhäilä.

– Jos haluat refleksit ja kväänin kielen plakkarhiin, niin tule tänne Naavuonhoon, sanoo Katriina Pedersen.