Ha-ha-ha! Se oon soma. Den var artig.
Vitsi yksi:
Mies oli lääkin luona ja kysyi neuvoi kunka hän saattais laihuttaat. Lääki antoi hänele reseptin.
– Sie saat aluksi 250 pilleriitä, lääki sanoi.
– Kunka monta mie häyđyn syöđä? mies kysyi.
– Sie et häyđy syöđä näitä pilleriitä. Mutta kolme kerttaa päivässä sie häyđyt viskata kaikki pillerit laattiile ja poimiit net ylös.
Vitsi kaksi:
– Uiminen oon mailman paras trimmi! Ko sie uit, sie pysyt hoikkana.
– Tuota mie vähän eppäilen. Katto nyt valhaitaki!
Vitsi kolme:
Yksi vaimo halusi laihtuut ja hän pruuvasi fantastista diettii missä oli valkkeeta löökkii. Hän laittoi sitä kaikheen mitä hän söi. Sitte meni kaksi kuukautta ja hän muisteli ystävälle:
– Kymmenen killoo hävisi – ja kans minun mies ja melkkein kaikki ystävät.
Vitsi nelje:
– Alkoholi hävitti meiđän kođin, vaimo parkui sosiaalikonttorissa.
Sosiaalityöntekkiijä oli täynä myötätunttoo.
– Se oon surulista. Alkoholi pillaa niin monen ihmisen elämän, sosiaalityöntekkiijä sanoi.
– Nii-in! Koko talo syttyi palamhaan ko jämmeprenttimasiini räjähti!
Vitsi viisi:
Kaksi miestä käveli tielä. Het olthiin aika humalossa.
– Emmä shitte muistele kenelkhään missä olema olheet, toinen sanoi.
– Emmä, emmä… mutta etkö shie kuitenki shaattais muistela shen minule?
Vitsi kuusi:
– Kunka sinula mennee elämässä?
– No se mennee ylös ja alas.
– Jaa, mie luulin ette sinula mennee hyvin.
– Joo, hyvin se mennee. Mie olen vaihettannu työtä ja mie olen nyt heisimontööri.
