Kukkolaforsen kesälä 2005. Kuva: Liisa Koivulehto
Ruottin regjeerinki oon nimittänny jäsenet komitehaan «Uppgörelse med historiska kränkningar och övergrepp mot tornedalingar, kväner och lantalaiset».
Liisa Koivulehto
liisa@ruijan-kaiku.no
Svenska Tornedalingars Riksförbund-Tornionlaaksolaiset (STR-T) ja Met Nuoret oon vaatinheet tätä vuuesta 2016.
Se oon määrä ette raportti oon valmis 16. maikuuta 2022.
Komiteea alkkaa selvittämhään mitä Ruottin valtio teki tornionlaksolaisile, kvääniile ja lantalaisile 1800- ja 1900-luvuila.
Se aikkoo tutkiit assimileeraamispolitiikkii ja tehhä näkkyyväksi sen mitä ihmisille oon tehty histoorian aikana. Mooli oon ette minoriteetti saa kollektiivisen hyvityksen ja ette tullee ehotus sovinosta ja estethään ette tämmöistä tapattuu tulleevaisuuessa.
Vahva kielen, histoorian ja oikkeuen kompetanssi
Ruottin hallituksen mellingissä seissoo ette kaksi komiteean jäsentä, Bengt Niska ja Josephine Ylipää, oon meänkieliset.
Komiteean johtaaja Elisabeth Fura oon juristi, entinen Ruottin oikkeusasiamies ja tuomari Europan ihmisoikkeuessa.
Ihmisoikkeustutkiija Malin Arvidsson (Lundin universiteetti) oon tutkinu vanhoita vääryyksii ennenki, niinko pakkosteriliseeraatuita raavhaita sekä lapsii joita oon pietty huonosti eli pahasti lastenhoitoinstitusuuniissa.
Lars Elenius (Luulajan universiteetti, emeritusprofessori) oon tutkinu kansalisten minoriteettiin elämänolloo histooriaalisesta perspektiivistä.
Kenneth Hyltenstam (Tukholman universiteetti, emeritusprofessori) oon tutkinu kaksikielisyyttä, kielen vaihtoo, vähemmistökielen säilyttämistä ja kaksikielistä opettamista.
Bengt Niska oon ollu Pajalan kunnanjohtaaja ja STR-T:n leederi. Niska oon meänkielinen.
Kaisa Syrjänen Schaal oon Ruottin kirkon advokaatti ja minoriteettikysymysten ekspertti. Hän oli sekretäärinä ko Ruottissa tutkithiin minoriteettipolitiikin seurauksii.
Sia Spiliopoulou Åkermark (Oolannin rauhantutkiimuslaitos) oon kansainvälisen oikkeuen apulaisprofessori. Hän oon ollu jäsen Europan raatin minoriteettikomiteeassa.
Josephine Ylipää (Lundin universiteetti) oon tutkiimusassistentti kestäävän kehityksen tutkimuksen sentterissä. Hän oli ennen Met Nuorten johtaaja ja hän puhhuu meänkieltä.
Ruottinkielinen pressemellinki oon tässä.
