Mari Keränen aloittaa Vesisaaren kielikeskuksen johtajana 19. novemperikuuta. • Mari Keränen skal begynne som daglig leder i det nye kvenske språksenteret i Vadsø. (Kuva: Liisa Koivulehto)

 

Kväänin kielikeskus Vesisaaressa lähtee aivan alusta.

 

Liisa Koivulehto
liisa@ruijan-kaiku.no

 

– Sielä oon huone missä on pöytä ja tuoli. Mie varmasti häyn ensistä mennä ostahaan ostamhaan kyniä ja paperia, Vesisaaren uuen kielikeskuksen johtaja Mari Keränen hunteeraa praktisena ihmisenä.
Hän oon paikala 19. novemperikuuta lähtiin.
Virka oon ensi alkhuun vuuen pituinen sillä rahaa oon saatu vuueksi. Jos se mennee hyvin ja rahaa tulee lisää, se oon maholinen jatkaa.

Vahva koulutus

– Millä mielelä sie tulet?
– Mie olen innossa ja jännittynny. Ensistä mie häyn tehhä työplaanan ja budsjetin. Styyrilä oon sikkaristi toivheita tässä. Osa tästä hommasta oon minule tuttua mutta osa oon tietenki semmoista mitä mie en ole koskhaan tehny, Mari Keränen sannoo.
Hänelä oon pitkä koulu takana: Hän valmistui maisteriksi 2009 ja sen jälkhiin hän oon tehny 6,5 vuotta teoreettista työtä kielen kans: Hän oon korjanu kväänin kielen sanoja Tromssassa ja Finmarkussa, hän oon työtely monta vuotta kväänin Nettidigisanaprojektissa ja hän oon vuuesta 2012 lähtiin tehny tohtorinväitöskirjaa minkä aihe oon neljen kielen (ruijan bokmål ja nynorsk, pohjoissaami ja kvääni) kielensuunnittelu.
– Koulutuksesta oon hyötyä mutta se oon välilä hyvä saaha tehhä praktista työtä ja erittäinki ihmisten kans. Mie jatkan mielelä sanankorjaamisprosjektii vaikka pyhinä jos se oon styyrile ok, hän sanoo.

Kohtaamispaikka

– Mie olen lukenu paljon kielisuunittelusta ja kielen kehittämisestä ja nyt mie pääsen itteki tekemhään sitä työtä, hän iloittee.
– Oletko sie keriny hunteeraamhaan minkälaista aktiviteettii Vesisaaren kielikeskuksessa saattais olla?
– Mie olen seuranu vähän mitä Raisissa tapattuu. Sielä tehhään paljon hyvvää kielityötä ja mie halluun olla heän kans kontaktissa. Kielikaffiloita aijoma tietenki pruuvata. Se olis soma jos tästä tulis semmoinen elävä paikka missä kävis ihmisiä, sekä vanhoja ihmisiä ette lastentarhaitten lapsia. Sielä saattais tehhä kaikenlaista ja puhua ja oppia kieltä, Keränen hunteeraa.
Hän oon Nettidigisanatyössä opastunnu kväänin kielen eri varianttiihiin. Vesisaaressa oon Varengin variantti.
– Net oon minula päässä teoreettisesti, ja nyt mie toivon ette mie pääsen sisäle puhekielheen.

Arktinen luonto
Mari Keränen oon Oulusta. Hän työteli Tromssassa universiteetissä tohtoritutkijana vuosina 2012-2016 ja reissasi silloin Finmarkussaki. Koillis-Lappi oon hänele opas ko hänen mies oon Inarista mutta Vesisaaressa hän ei ole koskhaan ennen käyny.
– Jännittävän työn lisäksi mie ootan ette pääsen kävelemhään karussa luonossa – sitä mie olen kaivanu eteläsuomalaisessa kaupungissa.
Hänen mies ja nyt 15-vuotias poika pysythään Vanthaala – mihin ei ole pitkä matka Ivalon lentokentältä.