Tromssan museuumin valokuvanäyttely esittää ruijansuomalaissii ja kainulaissii ennen ja nyt.

Liisa Koivulehto
liisa@ruijan-kaiku.no

Näyttelyn kuvat oon valokuvakonkuransista Yhdessä-Sammen minkä ideea lähti Tromssan ruijansuomalaiselta yhistykseltä.

– Tavalisesti tutkiijat muistelhaan tavalisile ihmisile millä laila assiit oon. Nyt se meni toisinpäin: Tromssan ruijansuomalainen yhistys halusi ette ruijansuomalaiset ja kainulaiset itte näytethään kekkä het oon. Ideea oli niin hyvä ette siinä met halusima olla myötä! Tromssan museuumin publikummikontakti Per Helge Nylund sanoi.

– Näissä kuvissa näkkyy kainulaisten ja ruijansuomalaisten monet haamut, perintö ja histooria sekä meän vahva kontakti luonthoon, merheen ja saunhaan, Ruijan kveeniliiton johtaaja Hilja Huru sanoi.
Suomen suurlähettiläs Erik Lundberg aukaisi näyttelyn.

– Täälä pohjaisessa Suomen tunnethaan paremin ko etelässä. Onnee päiväle! Kiitos jokhaisele jokka rakenethaan siltoi Suomen ja Norjan välile, Lundberg kiitteli.

Vähän yli vuosi aikkaa kummitäti Anne Mäkinen otti kuvan ko Reetta (vas.) ja Jan Ivar Andreassenin vanhiin poika Iivari istui pesofatissa saunassa. Kuva voitti konkuransin Yhđessä-Yhessä-Sammen! Näyttelyn aukaisemisjuhlassa Iivari (melkkein 4 vuotta) istui isän sylissä. Toinen kummitäti Heli Järveläinen oli kans tullu paikale.
KUVAT: LIISA KOIVULEHTO

Iloiset voittaajat
Kolme kuvvaa palkithiin. Kaksi kuvvaajista oli paikala.
– En uskonu ette mie saattaisin päästä tähään joukhoon! Tämä kannustaa jatkamhaan valokuvvaamista, iloisesti yllättynny Margit Varvik sannoo.
Hän kävelee paljon ja ottaa kaunhiita kuvvii mobiilin kameralla ja jakkaa niitä Feispuukissa ihmisten iloksi. Kolmanen palkinon saanheen kuvan hän oli ottanu Tromssan Telegrafbuktassa.
Anne Mäkinen kuvasi voittaajakuvan aivan toisessa päässä Tromssansaarta eli Tromssan ruijansuomalaisen yhistyksen saunassa.

– Mie häyin knipsata kuvan hopusti ovensuusta ette linshiin ei tulis höyryy. Kiitos mallile! Se oon minule fantastista saaha tämän palkinon! kilpailun voittaaja Anne Mäkinen sannoo.

Voittaajakuvat ja seittemän muuta uutta kuvvaa sekä kymmenen vanhaa kuvaa kainulaisista ja ruijansuomalaisista oon hengattu seinäle Tromssan museuumin Suuressa salissa. Kaikki konkuranshiin osalistunheet kuvat näytethään kans digitaalisesti salin loukossa.

Näyttely oon Tromssassa januaarikuun puolivälhiin asti. Se oon meininki ette kuvvii näytethään sen jälkhiin muuvalaki.

• Det kom 75 bilder til fotokonkurransen Yhessä-Yhđessä-Sammen som hadde tema kvensk og norskfinsk hverdag i dag. En jury valgte ut ti bilder som ble produsert til veggbilder og satt sammen med historiske foto fra museer og arkiver. I bildeparene kan vi se både likheter og kontraster. Alle bildene vises også digitalt i utstillinga som er på Tromsø museum til midten av januar 2018. Utstillinga er også en del av et skoleopplegg om kvener som museet tilbyr denne høst.