Hurttiiruutta MS Midnattsolista rakenethaan hybridilaiva MS Erik Raude joka alkkaa käymhään Yykeänvuonola maikuussa 2021. (Kuva: Hurtigruten/Maximilian Schwarz)
Ko Hurttiiruutta alkkaa käymhään Yykeänvuonola kesälä 2021, matkustaajat saavat kuula kainulaista ja kväänikulttuurista.
Liisa Koivulehto
liisa@ruijan-kaiku.no
Raisilainen kulttuurifirma ihana! sai joku aikkaa takaperin telefuunin Visit Lyngenfjordista. Inger Birkelund sai kysymyksen: Saattaisko hän tehhä Hurttiiruutta-vierhaile esityksen missä muistelhaan kvääniistä? Se olis kesälä 2021 ja esityksii olis 27 kerttaa, mai-septemperikuun aikana.
Hän vastasi paikala ette kyllä.
Les også: Gjestene skal lære om tre stammers møte
– Tämä oon hirmuisen hauskaa ja jännittäävää. Mie en tiiä vielä mitä mie heile muistelen mutta tässä oon vielä aikkaa tehhä plaanan, hän sannoo.
Birkelund perusti kulttuurifirman ihana! vuona 2010. Hän oon siitä lähtiin tarjonu muisteluksii kainulaisista monenlaisissa paikoissa ja tiloissa, erilaisile publikuumiile. Siksi Visit Lyngenfjord tiesi kenele het häyttyyvät ringata.
Paikalista luonttoo, kulttuurii ja ruokkaa
Plaanan jälkhiin Hurttiruutta käy kesälä 2021 Yykeänvuonola 27 kerttaa. Laiva viipyy Havnnesissa 10 tiimaa. Päivän aikana matkustaajiile tarjothaan nelje reissualternatiivii: Yykeä (Årøybukt), Kaivuono (Holmenes, Ankerlia, Gorsan silta), Kierua (Aurora Salmon Centre, Leonhard Seppala-parken) ja Raisi (Reisaelva, Ovi Raishiin).
Havnnes oon Uløyan eteläpäässä, Yykeän Alppiin öystäpuolela. Kartta: Hurttiiruutta
– Met olema vastuussa kaikista näistä reisuista, Visit Lyngenfjordin johtaaja Georg Sichelschmidt muistelee.
– Hurttiiruutta otti meihiin kontaktin vuuen 2019 alussa, ja aloima dialoogin. Reisuin aikana vierhaat saavat opastuut paikalisheen luonthoon ja kulttuurhiin, ja heile tarjothaan paikalista ruokkaa. Aijoma muistela kaikista kolmesta kansasta kaikkiin neljen reisun aikana, mutta kainulainen kulttuuri oon erityisen hyvin näkkyyvillä Raisissa, Sichelschmidt sannoo.
Raisissa vierhaat kulkkeevat jokivenheelä ylös Reisajokkee. Esitys kainulaisista oon Ovi Raishiin-sentterissä mikä oon sama paikka missä Kyläpelin oon esitetty.
Hurttiiruutta kirjoitti pressimellingissä syksylä ette uusi konsepti oon heile erityisen mieluinen.
– Tästä olema unistelheet monta vuotta. Nyt tästä unesta tullee viimin tosi. Meille tullee vierhaita koko mailmasta, ja nyt saama näyttäät vieläki usseeman paikan meän uniikilla rannikolla, mellingissä sanothaan.
